DOWNLOADMifala i harem nogud blong anaonsem se Presiden M. Russell Ballard, Akting Presiden blong Kworom blong Olgeta Twelef Aposol blong Jos Ia blong Jisas Kraes blong Ol Lata-dei Sent, i bin ded. Afta we hem i stap blong wan sot taem long hospital, hem i bin gobak long hom blong hem blong mekem ol laslas wok blong hem we hem i bin save mekem, bifo hem i lusum laef long samples 11:15 long Sandei naet, 12 Novemba, 2023, wetem olgeta we hem i lavem raon long hem. Hem i bin gat 95 yia.
Presiden Ballard i bin kam olsem wan Aposol long 6 Oktoba, 1985. Oli anaonsem hem olsem Akting Presiden blong Kworom blong Olgeta Twelef Aposol long 16 Jenuware, 2018. Semmak olsem Ol Aposol long ol taem blong Niu Testeman, oli singaotem Ol Aposol blong tedei blong stap olsem ol spesel witnes blong Jisas Kraes. Presiden Ballard i wan aot long 15 man we oli stap lukluk long gro mo divelopmen blong Jos raon long wol, we naoia i gat moa long 17 milian memba.
Presiden blong Jos, Presiden Russell M. Nelson i talem, “Presiden Ballard i save stap mekem ol gudfala desisen oltaem.” “Hem i save stret wanem we Lod i tijim mo olsem wanem oli save yusum long laef blong wan man o woman mo karem glad mo hapines i kam long laef blong man o woman ia.”
“Mitufala i wok kolosap tugeta, mo oltaem mi lavem gudfala fasin blong hem,” Presiden Dallin H. Oaks blong Fas Presidensi, we i bin stap sidaon narasaed long Presiden Ballard long Kworom blong Olgeta Twelef Aposol blong moa long teti yia, i talem. “Hem i wan man we yu save trastem. Mo hem i wan man we i trastem yu.”
Presiden Ballard i gohed blong laef tru long ol seven pikinini blong hem, 43 apu pikinini blong hem, 105 bigfala apu pikinini blong hem, mo wan bigfala bigfala apu pikinini blong hem.
Ol ditel blong fenerol i stap kam yet.