DOWNLOADTi nanokawaki ni katanoata bwa e a motirawa Beretitenti M. Russell Ballard, te Bonomwi ni Beretitenti n aia Kooram Abotoro ake Tengaun ma Uoman n Ana Ekaretia Iesu Kristo ibukiia Aika Itiaki ni Bong aika Kaitira. I mwiin tikuna n te onaoraki tabeua te tai, e okira mweengana ike e karaoi ana beku ake e kona ni karaoi i mwaain are e motirawa n te 11:15 n tairikin te Tabati, Nobembwa 12, 2023, ni katobibiaki irouia ana utu aika a bati n tangiria. Bon 95 ana ririki.
E riki Beretitenti Ballard bwa te Abotoro n Okitobwa 6, 1985. E katanoataaki nakoana bwa te Bonomwi n Beretitenti n aia Kooram Abotoro ake Tengaun ma Uoman n Tianuare 16, 2018. N aroia Abotoro ake n te Nu Tetemanti, ao a weteaki abotoro ni boong aikai bwa taan kakoaua aika a onoti ibukin Iesu Kristo. Beretitenti Ballard bon temanna mai buakoia 15 mwaane ake a tararuaa rikiraken ao waakin te Ekaretia n te aonaaba ae bwanin, are riaon 17 te mirion mwaitiia kaain te aro n te tai aei.
“’E aki kona n nanokokoraki Beretitenti Ballard,” E taku te Beretitenti n te Ekaretia ae Russell M. Nelson. “E ataa raoi ana reirei te Uea ao aron mwakuriana inanon maiun temanna ma temanna are e na uota te kimwareirei ao te kukurei.”
“Ti ikarekebai inanon te mwakuri, ao e aki toki n teke nanou ni kateina ae maem,” e taku Beretitenti Dallin H. Oaks man te Moan Beretitentii, are e a tia ni mwakuri ma Beretitenti Ballard n te Kooram n Abotoro ake Tengaun ma Uoman n te maan ae riaon 30 te ririki. “Bon te mwaane ae onimakinaki. Ao bon te mwaane ae onimakini ngkami.”
Beretitenti Ballard a tiku imwina itiman natina, 43 tibuna, 105 tibutoruna, ao temanna tibumwamwanuna.
E tuai bwanin rongorongon te taunimate n te tai aei.