Naʻe kamata ke toe fakaava ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e ngaahi temipalé ʻi Mē 2020 ʻo ngāue ʻaki ha founga tokanga kae fakakongokonga ʻe fā ke fenāpasi mo e mahaki fakaʻauha KOVITI-19.
Kuo mei kakato ʻa e ngaahi temipale kotoa ʻe 168 ʻa e siasí hono toe fakaava ʻi he Tūkunga 1 (sila ʻa e husepānití mo e uaifí pe mali temipale, ʻi he ʻapoinimeni). Ko e lahi taha ʻo e ngaahi temipalé kuo hiki ki he Tūkunga 2 (ʻatā ke fai e ngaahi silá mo e ngaahi ouau kotoa pē maʻá e kakai moʻuí).
ʻI he ʻaho ní, ʻoku fanongonongo ʻe he Kau Palesitenisī ʻUluakí ʻoku teuteu ha ngaahi temipale ʻe fā ke ʻunu ki he Tūkunga 3 ʻo e hono toe fakaavá ʻo kamata ʻi he ʻaho 21 ʻo Tīsema 2020. · Nuku’alofa Tonga Temple · Apia Samoa Temple · Brisbane Australia Temple · Taipei Taiwan Temple
ʻOku kau ʻi he Tūkunga hono 3 ʻa e meʻa kotoa pē kuo fakaʻatā ʻi he tūkunga 1 mo e 2, kae tānaki atu ki ai mo e ngāue fakatemipale maʻá e kakai kuo pekiá. Ko e ngaahi temipale ʻe fā ko ʻení ʻoku ʻi he ngaahi feituʻu ia ʻoku siʻisiʻi ai ʻa e KOVITI-19 pea ʻoku malava ʻe he Siasí ʻo feau e ngaahi tuʻutuʻuni ki he moʻui ʻa e kakaí ʻi he fakataha fakatokolahí mo e lotú.
Ko e Hoko ko ha Tauhi ki Hotau Kāingá Lolotonga ʻa e Mahaki Fakaʻauhá: Ko e Fie Maʻu ke Fakalahi ʻa e Ngaahi Tuʻutuʻuni ki he Tuʻunga Malú
Ko e toe foki ia ke fakahoko ʻa e ngaahi ouau toputapu mo ʻaonga maʻá e ngaahi kuí—tautautefito ki he lolotonga ha mahaki fakaʻauha ʻokú ne uesia ʻa e niʻihi ʻoku laveangofua taha ʻiate kitautolú—ko ha fakamanatu ia ʻo e loto-tokanga ʻoku totonu ke tau maʻu ki he niʻihi kehé.
“ʻI heʻetau fakatuʻamelie ke fakahoko ha ngaahi ouau fakafofonga lahi ange ʻi he temipalé, ʻoku tau fai ai ki he niʻihi kehé ʻa e meʻa ʻoku ʻikai ke nau lava ʻo fai maʻanautolú. Ka ne taʻeʻoua e ngaahi tāpuaki ko ʻení, ʻe faingataʻaʻia lahi e kakai ko ʻeni kuo pekiá,” ko e lea ia ʻa ʻEletā Dale G. Renlund ʻo e Kōlomu ʻo e Kau ʻAposetolo ʻe Toko Hongofulu Mā Uá. “Naʻe akoʻi ʻe he Fakamoʻuí ko e fekau lahi hono uá, hili e ʻofa ki he ʻOtuá, ko e ‘Ke ke ʻofa ki ho kaungāʻapí ʻo hangē pē ko koé.’ ʻI heʻene fekauʻaki mo e mahaki ko ʻení, tautautefito ki he temipalé, ʻoku ʻuhinga ia ki he vāmamaʻo fakaetangatá, tui ha meʻa mānava, pea ʻikai fakataha fakatokolahi. ʻOku fakahaaʻi ʻe he ngaahi meʻá ni ʻetau ʻofa ki he niʻihi kehé pea ʻomi ai ha maluʻi. Ko hono tui ha meʻa mānavá ko ha fakaʻilonga ia ʻo e ʻofa faka-Kalaisi ki hotau kāingá.”
Ko e Faingamālie ke Moihū ʻi he Temipalé
Ko e ngaahi temipalé, ʻa e ngaahi potu toputapu taha ʻa e Siasí, ko e feituʻu ia ʻoku fakahoko ai ʻe he siasí ʻa e ngaahi fatongia mahuʻinga ke tokoni ke tānaki ʻa e kakai ʻo e ʻOtuá—ʻa kinautolu ʻoku kei moʻuí pea mo kinautolu kuo maté fakatouʻosi.
ʻOku pehē ʻe ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e uho ʻo e ngāue ʻa e ʻEikí ko hono liliu, fakatafoki, mo fakahaohaoaʻi e ngaahi lotó ʻo fakafou ʻi he ngaahi fuakava ʻo e ongoongoleleí mo e ngaahi ouau ʻo e lakanga fakataulaʻeikí. ʻI heʻetau femoʻuekina ʻi he ngāue toputapú ni, ʻoku tau talangofua ai ki he ngaahi fekau ke ʻofa mo tokoni ki he ʻOtuá mo hotau kaungāʻapí. Pea ʻoku tokoni e faʻahinga ngāue taʻesiokita ko iá ke tau ‘Fanongo [moʻoni] kiate Ia!’ pea haʻu ki he Fakamoʻuí.”
Koeʻuhí ko hono mahuʻinga ʻo e ngaahi temipalé ki he kāingalotu ʻo e Siasí, ʻoku pehē ai ʻe ʻEletā Bednar, “ko e foki ki he tempalé ko ha meʻa ia kuo mau lotua mo fakatuʻamelie ki ai ʻi he loto-vēkeveke. ʻOku tau fiefia he faingamālie ke toe ngāue mo moihū ʻi he temipale māʻoniʻoní, neongo kapau ʻe kehe ʻetau aʻusiá koeʻuhí ko e ngaahi tūkunga fakangatangatá mo e ngaahi feilaulau lahi ange ʻoku kole mai ke tau faí.”
Naʻe pehē ʻe he ʻAposetoló ʻi heʻene lea ʻaki ʻa e lea naʻe fai ʻe he Palōfita ʻo e Siasí ko Palesiteni Thomas S. Monson (1927–2018), kuo hoko ʻa e feilaulaú ko ha konga ʻo e ngāue fakatemipalé talu mei he kamata ke langa ʻe he Siasí ʻa e fuofua fale ʻo e ʻEikí ʻi Ketilani, ʻOhaiō ʻi he 1833. Naʻe pehē ʻe Palesiteni Monisoni ʻi he 2011, “ʻOku ʻiloʻi ʻe kinautolu ʻoku mahino ki ai ʻa e ngaahi tāpuaki taʻengata ʻoku maʻu mei he temipalé, ʻoku ʻikai ha feilaulau ia ʻe fuʻu lahi, pe totongi ʻe fuʻu mamafa, ha faingataʻa ʻe fuʻu tōtuʻa, kehe pē ke maʻu e ngaahi tāpuaki ko iá. He ʻikai ha ngaahi maile ia ʻe fuʻu lahi ke fonongaʻia, ngaahi fakafeʻātungia ke ikunaʻi pe taʻefiemālie ʻe taʻe lava ke kātakiʻi.”
ʻI he kamata ha ngaahi temipale ʻe niʻihi ʻa e Tūkunga 3 ʻo hono toe fakaavá lolotonga ʻa e mahaki fakaʻauha KOVITI-19, ʻoku fakamanatu mai ʻe ʻEletā Bednar ki he kāingalotu ʻo e Siasí ʻi he feituʻu kotoa pē ko e moihū ʻi he ngaahi temipalé “ko ha faingamālie toputapu ia, kae ʻikai ko ha totonu pe ko ha konga pē ʻo ʻetau ngāue angamahení. ʻOku ʻikai ke tau omi ki he temipalé ke toitoi pe hola mei he kovi ʻo e māmaní. Ka ʻoku tau haʻu ki he temipalé ke maʻu e mālohi ʻo e anga faka-ʻOtuá ʻo fakafou ʻi he ngaahi ouau lakanga fakataulaʻeiki ʻoku nau ʻai ke tau malava ʻo matatali mo ikunaʻi e kovi ʻo e māmaní.”
Ko e hā ʻe Ala Hoko ʻi he Tūkunga 3
ʻE kau ʻi he Tūkunga 3 ha kau pataloni mo ha kau ngāue temipale tokosiʻi pē, ko ha taimi-tēpile fakangatangata ʻo e temipalé, mo e toki ʻalu pē ʻo temipale ʻi hano fokotuʻu ha ʻapoinimeni.
Ke teuteu ke ʻaʻahi ki ha temipale ʻi he Tūkunga 3, ʻoku totonu ke ʻiloʻi ʻe he kāingalotu ʻo e Siasí ʻa e fakamatala ko ʻení:
· Fakataimitēpileʻi ha ʻapoinimeni ʻi he ʻinitanetí: Ko kinautolu ʻoku nofo ʻi he ngaahi ngataʻanga ʻo e vahefonua ʻo ha temipale ʻoku ʻi he Tūkunga 3, ʻe lava ke nau fakataimitēpileʻi ha ngaahi ouau ʻi he ʻinitanetí ʻi he peesi takitaha ʻo e temipale ko iá ʻi he temples.ChurchofJesusChrist.org. (Ko e ngaahi temipale kotoa ʻe fā ʻoku lisi atu ʻi ʻolungá ʻoku fehokotaki hangatonu pē ki he peesi fakaʻofisiale ʻa e Siasí.) Ko e fili foʻou ko ʻeni ʻi he ʻinitanetí ʻoku ʻatā pē ia ki he ngaahi temipale ʻoku ʻi he Tūkunga 3. ʻOku totonu ke tomuʻa fokotuʻu ʻe he kāingalotu ʻo e Siasí ha ʻapoinimeni ʻi he ʻinitanetí kimuʻa pea nau toki haʻu ki he temipalé. ʻE ʻuluaki fakamuʻomuʻa ʻa kinautolu ʻoku nau fie maʻu ʻa e ngaahi ouau maʻá e kakai moʻuí. ʻOku pehē ʻe ʻEletā Gary E. Stevenson ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku mau fiefia ke kamata fakaʻaongaʻi ʻe he kau pataloní ha meʻangāue foʻou he ʻinitanetí ke puka e ngaahi ouaú. Kapau te ke fie maʻu tokoni ʻi hono ʻai ho ʻapoinimení, fetuʻutaki ki hoʻo tangata pe fefine ngāue fakaetauhí, kaungāmeʻá, fāmilí pe taki fakalotofonuá. Te nau fiefia ke tokoniʻi koe. ʻE ʻi ai ha ngaahi feituʻu he ʻikai maʻu ai ʻa e meʻangāue he ʻinitanetí. Ka ʻe kei lava pē ke ʻai ha ngaahi ʻapoinimeni ʻi he ʻīmeilí pe tā telefoni ki he temipalé.”
· Sivi ʻo e fakaʻilonga ki he mahakí: ʻE fehuʻi tuʻo tolu atu kiate koe fekauʻaki mo e ngaahi fakaʻilonga ʻo e KOVITI-19. ʻE fai ʻa e ngaahi sivi ko ʻení ʻi he taimi te ke fokotuʻu ai ʻa e ʻapoinimení, ʻi ha ʻīmeili kimuʻa peá ke ʻalu ki he temipalé, pea mo e taimi te ke aʻu ai ki he temipalé.
· Meʻa-Maluʻi ki he fofongá: Kuo pau ke ke tui ha meʻa-maluʻi ki he fofongá ʻi he taimi kakato te ke ʻaʻahi ai ki he temipalé, tukukehe kapau ʻokú ke kau ʻi he papitaisó.
· Ngaahi fakatokanga kehe ki he tuʻunga malú: ʻE tauhi maʻu pē ʻa e maʻá mo e haisiní ʻi loto ʻi he temipalé he ʻaho takitaha. ʻE lahi ha ngaahi hina fanofano ʻe fokotuʻu ʻi ha ngaahi feituʻu kehekehe.
· Teunga temipalé: Kapau ‘e lava, ʻoku totonu ke ʻomi ʻe he kau pataloní ʻenau teunga hina pē ʻanautolu ki he ouaú.
· Fai‘anga papitaisó: He ʻikai ngofua ke tokolahi ange ʻa e ngaahi kulupú ʻi he toko 16. ʻOku poupouʻi ʻa e kau pataloní ke nau ʻomi ʻenau kau ngāue pē ʻanautolu ki he faiʻanga papitaisó.
· ‘Enitaumení: Ko e fakanofonofo ʻi he ngaahi sēsini ʻenitaumení ʻe ngata ʻi he pēseti ʻe 30 ʻo e tokolahi ʻe hao he lokí. ʻE fakavahavaha ʻa e nofó pea ʻe tangutu fakataha ʻa e kau mēmipa mei he ʻapi tatau.
· Sila: Ko ha kau pataloni tokosiʻi pē ʻe fakaʻatā ki he silá. ʻE tangutu vāmamaʻo ʻa e ongo fakamoʻoní mei he tokotaha faisilá.
· ʻŪ kaati hingoa fakafāmilí: He ʻikai ke toe paaki ʻe he temipalé ʻa e ʻū kaati hingoá maʻá e kau pataloni ʻi he temipalé. Kuo pau ke fai ʻeni ʻe ha mēmipa kimuʻa pea nau toki omi ki he temipalé. ʻI he hili hano fakakakato ha ouau, ʻe lekooti ʻe he temipalé ʻa e fakamatalá ʻi he FamilySearch. He ʻikai ke toe fakafoki ʻa e ʻū kaati hingoá ki he kau pataloní.
· Fale nofo‘angá mo e falekaí: ʻE ngalingali ka kei tāpuni pē ʻa e ngaahi feituʻu ko ʻení. ʻOku fakaafeʻi ʻa e kau pataloní ke nau fetuʻutaki ki he temipale ʻi honau vahefonuá ki ha fakamatala lahi ange.
ʻOku pehē ʻe ʻEletā Stevenson, “Ko e temipalé ko e fale ia ʻo e ʻEikí, ʻoku fakahoko ai e ngaahi ouau māʻoniʻoní mo e moihū toputapu mahuʻingá. ʻI hoʻomou tauhi faivelenga ʻi he loto-fiefia mo vēkeveke ki he ngaahi liliu [ko ʻení], ʻe faitāpuekina, poupoua mo fakaivia kimoutolu.”